瑞典四年一度大選在即，今次選舉議席包括國會、縣議會、省議會。喺瑞典連續3年存在於人口登記系統嘅居民，包括外國人在內，皆有縣議會同省議會議席嘅投票權。至於國會投票權，基本上只有瑞典公民可行使。
各個政黨均喺斯德哥爾摩街頭設街站宣傳拉票。有別於好多國家政黨大鑼大鼓嘅風格，瑞典政黨宣傳形式比較被動，除咗電視辯論，成員主要都係企喺站內等待市民上前傾談，派派傳單，亦聽唔到呼聲震天嘅政綱口號廣播、造勢大會等等。
除咗傳統大黨們，如左黨、右黨、中間黨、自由黨外，仲有目標放喺環境生態提倡綠色政治嘅 Miljöpartiet de Gröna 。同時亦有不少規模較細嘅政黨擺站，例如打正旗號女權黨 Feministisk Initiativ，提出脫歐 Swexit 嘅極右派。當中最特別嘅就要數 Piratpartiet 海盜黨。海盜黨一直提倡放寬網上資訊分享嘅版權限制，如上載電影、音樂不應視為違法，認為現有版權法已經過時。呢個黨嘅存在真係體現出瑞典思想自由，比著其他發達國家唔俾啲大商家鬧到飛起都偷笑，應該冇咩機會出現呢類型嘅政黨，更加冇咩可能去參選國會。
Search